Tamurt

Tamurt

Lemmer yettmatcha wakal
Meqqar ad r’wunt wallen
Lemmer yettmatcha wedrar
Aâwin ugujil yiwen.

D arrac nezga-d s wudem
F tghaltin ger iberdan
Ay nuzzel ay nessarem
Anwa tura i s d-icfan ?

Tura lexyal n tmizar
Ata yezga ger wallen
Tura lexyal b-bwedrar
Tura lexyal isaffen.

Mi d-tbedred’ wid yemmuten
Amek ara srewlegh udem-iw
D akal yersen fellasen
I gersen ghef tuyat-iw.

Yesnagar wul gher zdat
Yesnagar wul gher deffir
Garasen texsi tafat
Aqlagh nedder ur neddir.

Mi d-tbedred’ wid ir’uh’en
Tezrid’ ula d nek ddigh
Mi d-tbedred’ wid yeqqimen
Tezrid’ yidsen ttghimigh.

Matchi d anyir i gh-yebbwin
Matchi d anyir i gh-yedjan
Matchi d yiwen nagh sin
a-s-tinid’ neffegh iberdan.

At’as umi lh’an deg wul
At’as i gsughen deg-yid’
I wegraw yesbeghn awtul
Amek tebghid’ a-s-tawid’ ?

Ula d arrac ttlummun
Ghef targit mi s d-ssukksen
Mi dlan s ussan d-iteddun
Yuzzel ighisi garasen.

Aghrebal i d-yegrarben
S akal n tteryel i gr’uh’
Imenza asmi zwaren
Yedda ulemmas d umejt’uh’.

Ula d aghrum d igellil
Tezrid’ ifellu tughmas
Ifellu am zal am yid’
Tawriqt-ik tenza fellas.

Wannag tezrid’ i gellan
Tezrid’ i gebbwi wudem
D aghrum i gbeddlen amkan
D aghrum i gbeddlen isem.

Tamurt tettnadi iman-is
Deg berdan tebda tuttra
M’ad as-bedden warraw-is
Wid yensan anda i tensa.

Mi d-tbedred’ wid yekkaten
Amar at-tbeddel tnafa
Wid yett’fen udem s udem
Wid s ifkan udem i tasa.

Fer’h’egh s kra yettlalen
D amgud i d-yezzewren imghi
Targit nnegh d asawen
Tett’ef akal tett’ef igenni.

Ma nnigh-ak am-massagi
Ula d aqdim a-d-ilal
Si zik win d-ifkan tidi
Yessaram ad-as tughal.

Ramadane Achab
1979.
Extrait de Tisuraf n° 3 (Paris, 1979).