Accueil > Actualité > D gma, ulac w’ara t-iwwten !

D gma, ulac w’ara t-iwwten !

Aḍris sɣur Rabeḥ Ixelfiwen.

samedi 1er mai 2021, par Masin

Ass n 27 di yebrir n usegg°as-agi i deg nella, adabu azzayri inna-d agejdur : d tikerkas ur nezmir ad ɛeddint. Am akken adabu-yagi n lmizireyya ibegs-as-d i Tmurt n Lebayel, dɣa yettnadi ans’ara s-d-yekk. Dacu yuɣal am akken fuken-as : ittɛawad i yɣessan asewwi. Dacu, Tiqbayliyin d Iqbayliyen kkren-d, yal ta anda tella, yal wa anda yella, a s-inin i wdabu-yagi uxeṣṣar : tiqullaɛin-ik iǧǧa-tent wakud.

Rabeḥ Ixelfiwen yuzn-aɣ-d aḍris anida d-yenna awal s wazal-is ɣef taluf-agi.


"Ur ttaǧǧaɣ win ara yewwten gma !"

Ahṛuḥu… adabu azzayri yettwaɣ !
Tikelt-a daɣen, am uccen, adabu azzayri ibɣa ad issinef kra seg-neɣ akken ad asen-yegzem targit, targit n tlelli. I ymeɣnasen n Mak yessnulfa-yasen-d ahdum. Issnemḍeṛ tikerkas d akken imeɣnasen-agi ttheggin ad sseɣlin, s leslaḥ, tamurt n Lezzayer. Ala allaɣen yettwaɣen neɣ wid iteddun am akraren ara yeddun d tikerkest am ta. Tikerkest ger tkerkas, mači d tikerkest ; d ahdum !

Teḍṛa-yas i weqbayli am uyaziḍ. Mi bɣan ad t-ččen ad as-inin aṭas i tessquɛuḍ. Mi ran ad as-rren tak°mamt, ad as-d-ssnulfun kra. Iḍelli kan, adabu yegzem tudert i 126 n iqbayliyen, amur ameq°ran degsen d ilmeẓyen. Amek ara yeqbel wallaɣ ? Kra dderya-nnsen tettidir di tmura tijenṭaḍ s yedrimen n wegdud, kra ad feẓẓen taɛṛabt tineslemt n tmara u ma nnan-d kra ad mezzlen neɣ ad ttwagezmen s teṛṣasin … ? Tafsut taberkant d yir targit i twaculin, i Leqbayel meṛṛa. Seg imir yerna yeɣza wasif gar udabu d wegdud aqbayli. Kra isegg°asen kan ar deffir d yir targit nniḍen, d ilmeẓyen nniḍen i wimi gemnen ad asen-rẓen tirga. Hudden tilisa n tesdawit n Tizi-Wezzu, di tafrara. Hudden tibbura, kkren i yesdawiyen, rẓan degsen targit n tefsut. Ur ten-ǧǧin ara ula ad lsen lqecc-nnsen. Zgezwen-ten, sdremjen-ten, flan iq°erray-nnsen nwan a d-ssneɣlen tiktiwin-nnsen.

Ma nerna kra isegg°asen ar deffir d tacmatt n “cap Sigli” neɣ n tawaɣit n 1963. Ar ass-a kenfen wulawen n twaculin i wimi yettwakkes sser. Cfant-as tlawin, cfant tɣaltin … Tewweḍ tfidi s iɣes.
Lezzayer n wass-a ur tuklal ara ad mmten fella-s Iqbayliyen d Teqbayliyin.
Ur aɣ-terr’ara tmara ad neddu d wid i ɣ-ittheggin tasraft. Ḥemmeln-aɣ kan ad nemmet ɣef tmurt. Ḥemmlen Aqbayli ittaɣen awal.
Agdud ifaq-as i wdabu amesbaṭli iran ad t-yawi deg webrid idammen. Uhu ! Ifassen-nneɣ zeddigit ! Aṭas i nefka deg dammen-nneɣ akken ad nsaɛlef wid d-ittezzin ɣef iq°erray-nneɣ.
Ar ass-a tamurt n leqbayel tettṛaǧu tudert di talwit, tekkat ɣef tlelli, tilelli i tarwa-s.

Si zik Leqbayel qqaren : « Xas ulamma ur ḥemmleɣ ara gma, ur ttaǧǧaɣ ara win ara t-yewwten ».
Ihi, am imezwura-nneɣ, ur nettaǧǧara win ara yewwten Feṛḥat d yemddukal-is !

Rabeḥ Ixelwiyen.

Messages