Ernan-tt d takna di tmendawt !

Kečč yerran iman-ik d agrawliw, kečč yelḥan deg yiberdan d iseggasen terniḍ leɛyaḍ, tenwiḍ tewwḍeḍ ɣer yixef n umennuɣ-ik !

Uqbel ad tecmumḥeḍ, uqbel ad tferḥeḍ, uqbel ad tessiwleḍ i yiḍebbalen akked iceṭṭaḥen ara igerrzen tameɣra-k, qqen allen-ik tiderɣalin, ldi allaɣ-ik iselɣen, mmekti-d ayen akk i yak-xedmen si 1949 ar ass-a (fiḥel akk ma tkemmleḍ ɣer tallit-nni ideg rran lejdud-ik d aklan) wali ayen i yak-xedmen, ẓer ma yella lǧerḥ yelḥem, ḥseb acḥal i yak-nɣan, ẓer sani i k-ssawḍen.

Uqbel ad tḥalfuḍ s uqendur-ik mi ara ycuf, wali-t amek yumes, nadi anwa i ak-t-issamsen.
Tutlayt ttmeslayen yeẓra, tutlayt ttmeslayen idurar, iɣeẓran, tizemrin akked wayen yeddren deg wakal-ik, ass-a qqazen-as aẓekka di tmendawt ; ẓẓulen fell-as, ssarden-tt s waman i d-ugmen si lḥiǧ asmi zzenzen isem-ik ay ameɣbun !

Ilaq ad teẓreḍ belli acengu-yik ur k-yeḥmil ara, si zzman yekkat amek ara k-yessenger, si zzman iḥseb-ik d akli, d aqeddac-is ar ass-a. “Ur yettak wezrem taqemmuct”, ur ak-yettak win i k-iḥekkmen ula d tawwurt i trewla.
Fkan-ak-tt d “tunṣibt” akken ad tt-nɣen azekka, ma yella d kečč ccḍeḥ, freḥ, cnu, jewweq alamma slan-ak-d ula d itran.

Kečč tnudaḍ aṣenṣeb, netta iqubel-ik-id s uṣebṣeb !
I wakken ur yettiɣzif wawal ; adabu n Lezzayer ur k-yebɣi, ur k-yeḥmil, ur k-yebɣi deg wakal-ik. Adabu n Lezzayer deg-k yessengar ma yella d kečč freḥ s yiɣes ma iḍeqqer-ak-t-id ɣer udaynin. Yessettu-k belli yedɣel, yessettu-k belli ilaq ad ihudd, yessettu-k belli iḍur ula d imɣan.

Ay aqbayli, uqbel ad tferḥeḍ s wayen i yak-d-yettunefken, ẓer anwa i yak-t-id-yefkan, d wayɣer i ak-t-id-yefka.


Irnaten Murad