Iď n Nnayr.




Ass nna iď n nnayr’ [1], iggru γ dujambir. Da ttidunt tmγarin, z’ďnt ibawn. Ddun ijijan s igran, awin d gsin tammayt d zzitun d uďar n utbir t tmaz’z’uγt n tili d lfas’s’a d txsayt d uqur’r’. Awin tammayt d zzit, gnt i lεtbat n tgmmi. Asin aqur’r’ d lfs’s’a d xizzu d uďar’ n utbir d tmz’z’uγt n tili, fkn tn i tmγarin.

Asint tmγarin dγayann kullu, zaydnt gis yan waqqa, gnt nn dγayann γ tgdurt, ntta d ibawn. Gnt fllas aman z’iďnin, ar ingga. Ar tassaεt nna inwa, asint daγtifiyya d zgzaw nns, gnt stt inn γ tgdurt ula nttat.

Tassaεt nna ir’ah’ imnsi, asint d talxca, nnan as : « Iqqur’ uxsas nnk ! » Wa nna yufan aqqa, nnan as : « Ih’la yak ssεd nnk ! »

Tassaεt nna ccan, asin yat tmťťus’t n uγr’um. Mmun tt inn γ tlxca, gn tt inn dar tďar’t n tflut, ag gis tns.

Illin daγ wi da iskrn lqaεida ufan inz’ď n uγyul, nγ asrdun, nnan : « Ran ad darsn zaydn γ usggas ann. » Iγ nn gis ufan kra ccεr izggaγn nγ izgzax, nγ awraγ, nnan : « Ira ad darnγ izayd kra n lfrac asggas ad. » Iγ nn gis ufan kra n tsttixt, nnan : « Ira a immt kra gisn γ usggas ann. »

Illin daγ wi da iskrn lqaεida yaďnin. Da ttasin ibawn d yirdn d tmzin d umsri d ikikr d tniltit. Ssarn tn, ar tn cttan γ yiď n nnayer. Rγn s lktrt n dγayann ssan. Nnan : « Ha nn asggas ibddl, ir’γa lh’al, tkka d trγi akal. » Illa gis lbaεď n isggasn, dda d nkkrn, afn d tilist, tqqn asn imi n tgmmaw.


Extrait de :

Pierre Amard, Textes berbères des Aït Ouaouzguite (Ouarzazate, Maroc), édités et annotés par Harry Stroomer, Edisud « Bilingues », Aix-en-Provence, 1997.