Talalit n yitri

Innesrurem-d [1] yiḍ amm kra n wuccen
Isars anucucen-nnes [2] ẓẓaynin ɣef waman.
Inurez ad isew g teɣbalut n tallest, amm ku (yal) tameddit.
Mhaqqyen [3] waman
Rgagen. Rekkiẓen
Ugin
Nnemrurin [4].

« Is isul usidd n tafuyt add yuɣul ? »
Tseqsa teɣbalut tallest.
« Amm ku yass seg mayed illa wakal tili tafuyt », inna-as yiḍ.
Tmessus tallest iẓelgen asidd ilqaqen [5] itleqqafen iman [6] ɣef iqaccwen [7] n idurar. Ur tri ad tt-tfel ad iddu. Izeggwaɣ amm unhi.
Iɣwma yigenna irwasen asif n idammen.
Ur yukiz yiḍ.
Ira ad ires ɣef wakal. Iṛmi seg uganni [8].
« Rẓem-as ad iddu. Aǧǧ-i ad suɣ seg waman-nnem, add suggzeɣ anuddem d usgunfu ɣef wallen n imdanen i-ithaggwamen. »
Terẓem tallest i yan ifizer [9] n tafuyt isellawen, tḍer-d tallest ɣef udrar.
Ammi isrey useṭṭa. Ansa [10] iffeɣ usidd, ikcem-t yiḍ. Iẓleg-t ger iɣallen-nnes dusnin.

Iswa yiḍ seg waman rekkiẓnin n teɣbalut. Yukey d usennan n tmektit ittemra g ugerḍ-nnes. Yakez is d-tlula kra n titrit.
Yannay-tt tulid seg tmurt. Isella awed i kra n uẓawan ifessusen ar isawal ɣef imezwura d wumyin-nnsen. Iwet awed aḍu n uqbu itɣusen g walmessi.
Iksi yiḍ titrit irɣan isettmer-tt g yigenna.

« Dɣikk [11], ilaq ad as-nefk isem », ayd inna.
Ur as-d-testin [12] tallest. Tefsey. Terwas akeffus [13] iɣwman akal d yigenna. Xseyn akw yitran af ad aǧǧin itri amaynu ad issadd i wulawen ẓẓaynin, kternin [14] s imeṭṭawen d ungaẓ [15]. Idmaren n imdanen tezdeɣ-ten tmettant. Da tettrun s ifesti.

Seg wakal, nnan :
« Ilula-d yitri meqquren ! »
Irnu yitri g usaddi, allig d-tuley tifawt. Innesrurem yiḍ, ineqqeṛ iceḍran-nnes seg unuddem d seg ukeffus n tallest, iffeɣ nnig tmurt.

« Ur ǧǧin anniɣ kra n yitri irwasen wa. Ad tt-fleɣ ad iseflilley [16] g yigenna, iseflilley g wulawen n imdanen timiḍa d tmiḍa n iseggwasen ɣwezzifnin », ayd inna yiḍ.

Ar iswingim yiḍ, inna-as : « Uress mayed igan isem-nnes ? »
« Yidir ! Ur ttettu isem-ddeɣ ! », ayd as-inna waqqay [17] n tallest tama n umeẓẓuɣ.

Yidir, ad yidir.

Aksil Azergi